“Ajo që është në qendër të negociatave Kosovë-Serbi, të ndërmjetësuara nga BE-ja dhe që ne si Itali e mbështesim fuqishëm është një marrëveshje pragmatike, e cila merr parasysh situatën aktuale. Është domosdoshmërisht një kompromis, por, sinqerisht, është kompromisi më i mirë që mund të arrihet në kushtet ekzistuese”. Kështu ka thënë ambasadori i Italisë në Kosovë, Antonello De Riu, i intervistuar nga televisioni Klan Kosova, në prag të misionit të ri në Prishtinë dhe Beograd të Përfaqësuesit të Posaçëm të BE-së për Dialogun në mes dy vendeve, Miroslav Lajçak, dhe takimi i ri i pritur mes Kryeministrit kosovar, Albin Kurti dhe Presidentit serb, Aleksandar Vuçiq, i planifikuar në Ohër (Maqedoni e Veriut), më 18 mars.
“Siç është theksuar edhe nga Këshilli i fundit Evropian, kjo është një mundësi historike për të vendosur marrëdhëniet midis dy palëve në një bazë të re dhe të qëndrueshme. Një mundësi që edhe Kosova edhe Serbia duhet ta shfrytëzojnë absolutisht, edhe për të realizuar perspektivën e tyre evropiane. Për ta bërë këtë, të dy vendeve u kërkohet të zbatojnë, plotësisht dhe pa kushte, detyrimet e ndërmarra në kuadër të Dialogut të lehtësuar nga BE-ja. Në rastin e Prishtinës, kjo nënkupton në veçanti krijimin e një Asociacioni/Bashkësisë së Komunave me shumicë serbe. Në këtë drejtim, Kosova nuk ka pse të frikësohet: do të jetë një entitet në përputhje me kornizën e vet ligjore dhe do të frymëzohet nga modelet më të avancuara evropiane”, shtoi shefi i Misionit.
Gjatë intervistës së realizuar nga gazetari Adriatik Kelmendi në kuadër të programit të analizës politike “Rubikon”, Ambasadori De Riu foli edhe për marrëdhëniet dypalëshe Itali-Kosovë dhe fokusin e ripërtërirë të Qeverisë në zonën e Ballkanit, “rajon në të cilin Italia synon të jetë protagoniste, nëse përdori fjalët e Zëvendëskryeministrit dhe Ministrit të Jashtëm Antonio Tajani”. “Pas vizitës së bërë në nëntor së bashku me Ministrin e Mbrojtjes Guido Crosetto, në Romë është planifikuar një Konferencë ministrore kushtuar pikërisht Ballkanit, e cila do të pasohet, në rastin e Kosovës, me një “prezantim të vendit” për investitorët italianë dhe një ‘forum biznesi’ në Prishtinë, për të inkurajuar një prani më të madhe të kompanive italiane në Kosovë”, nënvizoi ai.
Krahas angazhimit politik, diplomati vlerësoi aktivitetet promovuese kulturore. “Vetëm vitin e kaluar Ambasada organizoi 41 evente, një numër i paimagjinueshëm deri para disa vitesh. Një aksion përmes të cilit ne mbështesim gjuhën dhe kulturën italiane, por edhe mbi të gjitha institucionet kulturore kosovare, të cilat bëjnë aq shumë për vendin dhe me të cilin synojmë të krijojmë një partneritet, duke pasuruar programet e tyre me një prekje të frymës italiane. Kosovarët kanë treguar se vlerësojnë”, tha De Riu.
Intervistën e plotë e gjeni në këtë link: https://www.youtube.com/watch?v=XNAi-6O3jd8
Një fragment mund të shihet këtu: https://www.youtube.com/watch?v=xYv5RQOGPXk
