Italia e ka njohur Republikën e Kosovës më 21 shkurt 2008, disa ditë pas shpalljes së pavarësisë më 17 shkurt, në bashkërendim me partnerët kryesorë ndërkombëtarë dhe në përputhje me shumicën e vendeve të BE-së, duke vendosur njëkohësisht marrëdhënie diplomatike me Prishtinën.
Që në momentin e parë, Italia ka luajtur një rol udhëheqës në KFOR, misionin e udhëhequr nga NATO, i themeluar në vitin 1999 nën një mandat të Kombeve të Bashkuara për të garantuar sigurinë dhe stabilitetin në Kosovë. Italia është aktualisht kontribuuesi kryesor, me mbi 800 njësi në terren dhe deri më tani ka pasur 13 komandantë nga 28. Gjithashtu e rëndësishme është prania në EULEX, misionin civil të BE-së “Misioni i Bashkimit Evropian për Sundimin e Ligjit”, ku Italia aktualisht ka Shefin w Misionit.
Ka pasur shkëmbime intensive të vizitave dhe takimeve. Më 23 janar 2023, Presidenti i Republikës, Sergio Mattarella, priti në pallatin Quirinale Presidenten e Republikës së Kosovës, Vjosa Osmani-Sadriu. Ajo gjithashtu është me Kryeministren, Giorgia Meloni, në kuadër të Këshillit të Punëve të Jashtme të Samitit BE-Ballkani Perëndimor, më 13 dhjetor 2023, pasi ishte pritur më parë në Mnistrinë e Punëve të Jashtme nga Zëvendëskryeministri dhe Ministri i Punëve të Jashtme dhe Bashkëpunimit Ndërkombëtar, Antonio Tajani, më 14 prill. Ky i fundit gjithashtu ka takuar homologen e tij, Donika Gërvalla-Schwarz, në shumë raste shumëpalëshe edhe gjatë vitit 2024, në takimet periodike ministrore për Ballkanin Perëndimor dhe grupin “Miqtë e Ballkanit Perëndimor”, si dhe gjatë misionit të tij të parë në Prishtinë në nëntor 2022 së bashku me Ministrin e Mbrojtjes Guido Crosetto. Të shpeshta janë edhe kontaktet midis parlamentarëve të të dy vendeve. Në Prishtinë, vlen të përmenden misionet e një delegacioni të Komisionit të Punëve të Jashtme dhe Mbrojtjes të Senatit, më 8 shtator 2023 dhe të Komisionit të Punëve të Jashtme të Dhomës së Deputetëve, më 29-30 prill 2024.
Që nga shpallja e pavarësisë, Italia ka mbështetur Dialogun Kosovë-Serbi të lehtësuar nga BE-ja duke konsideruar ndërmjetësimin e Brukselit si kyç për arritjen e një zgjidhjeje të qëndrueshme dhe të pranueshme për të dy palët. Qëllimi përfundimtar është arritja e një marrëveshjeje gjithëpërfshirëse dhe juridikisht të detyrueshme që trajton të gjitha aspektet kyçe të marrëdhënieve midis dy Vendeve ballkanike, si statusi i Kosovës, mbrojtja e pakicave, çështjet ekonomike dhe ato që lidhen me trashëgiminë kulturore, me bindjen se kjo do të përfaqësonte një hap të rëndësishëm përpara në integrimin evropian të Ballkanit Perëndimor dhe në përputhje të plotë me vizionin italian për një Evropë të zgjeruar dhe të qëndrueshme, ku të gjitha Vendet e rajonit mund të përfitojnë nga avantazhet e anëtarësimit në BE.
(Përditësuar, më 24.06.2024)