Rikthehet në Kosovë Java e Gjuhës italiane në botë, veprimtaria e përvitshme që promovon gjuhën italiane, pasurinë e saj kulturore dhe rolin e saj në krijimtarinë bashkëkohore. Nisma organizohet nga rrjeti diplomatik dhe kulturor i Ministrisë së Punëve të Jashtme të Italisë, nën patronazhin e lartë të Presidentit të Republikës Italiane.
Në edicionin e saj XXVI, që do të mbahet nga 26 deri më 30 tetor, veprimtaria do t’i kushtohet temës “Gjuhë gjeniale: të ideosh, të projektosh dhe të krijosh në gjuhën italiane”. Ky edicion vë në pah larminë dhe potencialin e gjuhës italiane, e cila jo vetëm trashëgon një traditë të pasur kulturore, por është edhe një mjet që nxit dhe përcjell në botë aftësinë krijuese dhe mjeshtërinë italiane. Në këtë mënyrë, gjuha italiane bëhet një pasqyrë e përsosmërisë italiane, duke nxjerrë në pah lidhjen e ngushtë mes kulturës dhe zhvillimit ekonomik në fusha të ndryshme, nga teknologjia dhe inxhinieria te dizajni, letërsia dhe gastronomia.
Me këtë rast, Ambasada e Italisë në Prishtinë ka përgatitur një program të pasur me aktivitete, me synimin për t’iu afruar brezave të rinj, duke filluar nga fëmijët, dhe për të promovuar gjuhën italiane si një mjet për të shprehur krijimtarinë në të gjitha fushat.
Për këtë arsye, Ambasada ia ka kushtuar figurës së Leonardo da Vinçit aktivitetin hapës të Javës së Gjuhës italiane në botë 2026 (SLIM2026).
Më 26 tetor, në orën 17:15, në Bibliotekën Kombëtare të Kosovës “Pjetër Bogani”, ambasadori Maurizio Antonini do të përurojë hapësirën e dedikuar librave në gjuhën italiane, të dhuruar nga Bibliotekat Qytetare të Torinos, të përfaqësuara nga znj. Rosanna Nocco së bashku edhe komandantin e bazës së Karabinierëve në kuadër të misionit KFOR-it, Di Fiore, i cili ka lehtësuar bujarisht transportin e librave të dhuruar. Më pas, profesori Lorenzo Coveri, ish-profesor i rregullt i Gjuhësisë Italiane në Universitetin e Gjenovës dhe anëtar korrespondent i Akademisë së Kruskës, do të prezantojë botimin e kësaj akademie me titull “gjuhë e sjellshme, gjuhë gjeniale: të krijosh ide, të projektosh dhe të krijosh në gjuhën italiane., duke u ndalur veçanërisht te gjenialiteti i gjuhës së Leonardo da Vinçit.
Në vijim, do të përurohet një ekspozitë kushtuar figurës dhe veprës së Leonardo da Vinçit, e përgatitur nga ambasadori Stefano Baldi dhe e përkthyer në gjuhën shqipe, me synimin për t’ua bërë të njohur figurën e tij sa më shumë nxënësve dhe personave të interesuar. Ekspozita, e konceptuar si një ekspozitë shëtitëse, do të prezantohet më pas në shkolla dhe universitete të ndryshme në Kosovë.
Aktivitetet e tjera do t’u kushtohen më të vegjëlve.
Të premten, më 23 tetor, në ambientet e Ambasadës, me rastin e Ditës së patës italiane në botë, do të organizohet një aktivitet edukativ që ndërthur mësimin e gjuhës italiane me promovimin e makaronave si shprehje e identitetit dhe e aftësisë prodhuese italiane. Një grup i vogël nxënësish që mësojnë gjuhën italiane në Princeton School of Prishtina do të përgatisë makarona të freskët, me ndihmën e shefit të kuzhinës Burim Gashi nga restoranti Spagu. Me mbështetjen e profesoreshës Raffaella Ritucci, lektore e gjuhës italiane në Prishtinë, fëmijët do të mësojnë edhe fjalorin përkatës në italisht, duke ndjekur ushtrimet e ilustruara në librin “Pane, Pasta, Pizza” (Bukë, pasta, pica), me autore Franca Bosc dhe Lucia Cucciarelli, botuar nga shtëpia botuese Loescher.
Programi do të vijojë të martën, më 27 tetor, në Bibliotekën e Fëmijëve në Prishtinë, një bibilotekë e re, ku do të përurohet një kënd i ri me libra në gjuhën italiane. Në ambientet e bibliotekës, Ambasada do të organizojë një pasdite me ushqime të lehta italiane dhe leximin e përrallës së Pinokut për fëmijët e shkollës “Avni Rrustemi”, nga fshati Mramor. Me këtë rast, fëmijët do të ftohen të zbukurojnë bluza të bardha me mesazhe paqeje, në kuadër të projektit “Vela della Pace” (Vela e Paqes). Njëra prej bluzave të realizuara do të dërgohet në Itali, ku do të bashkohet me pjesët e tjera të projektit, të përgatitura me kontributin e rrobaqepëseve të lagjes Scampia. Më pas, ajo do të ekspozohet në Napoli, në kuadër të veprimtarive të lidhura me America’s Cup.
Java do të përmbyllet të premten, më 30 tetor, në orën 18:30, në Sekhmet Institute në Prishtinë, me shfaqjen e filmit “Pane e tulipani” (Bukë dhe tulipanë), me regji të Silvio Soldinit, në bashkëpunim me Ambasadën e Zvicrës në Prishtinë. Kjo komedi italo-zvicerane, me aktorët Licia Maglietta dhe Bruno Ganz, rrëfen historinë e Rosalbas, një amvise nga Peskara, e cila harrohet nga familja gjatë një ekskursioni. E gjendur në Venecia, ajo shfrytëzon rastin për t’i dhënë një drejtim të ri jetës së saj, duke rizbuluar veten dhe lirinë personale. Filmi, fitues i nëntë çmimeve David di Donatello në vitin 2000, do të shfaqet në gjuhën italiane me titra në anglisht.
Java e Gjuhës Italiane në Botë është veprimtaria kryesore ndërkombëtare për promovimin e gjuhës italiane. Ajo organizohet çdo vit nga rrjeti diplomatik dhe konsullor italian dhe Institutet Italiane të Kulturës, në bashkëpunim me partnerët tradicionalë në fushën e promovimit të gjuhës: Ministrinë e Kulturës, Ministrinë e Arsimit dhe të Meritës, Ministrinë e Universiteteve dhe Kërkimit Shkencor, Qendrën për Librin dhe Leximin (CePeLL), Qeverinë e Konfederatës Zvicerane, Akademinë della Crusca, Këshillin e Përgjithshëm të Italianëve jashtë vendit (CGIE), Komunitetin Radioteleviziv Italishtfolës, Institutin e Enciklopedisë Italiane Treccani, RAI Italia dhe Shoqatën Dante Alighieri.
