Ambasadori i Italisë në Kosovë, Antonello De Riu, duke folur në pritjen e organizuar dje në mbrëmje në Prishtinë për Festën e Republikës së 2 qershorit, theksoi se si festa përkon me tensionet e fundit në veri të Kosovës, të cilat kanë çuar në plagosjen e ushtarëve të shumtë të KFOR-it, forcës së NATO-s në Kosovë.
“Në emrin tim dhe në emër të Qeverisë, shpreh solidaritetin e plotë me ushtarët italianë, hungarezë dhe moldavë të plagosur në përleshjet e ditëve të fundit në Zveçan, njëherit shpreh dënimin më të ashpër të dhunës ndaj misionit të KFOR-it”, tha Ambasadori duke folur në pritjen, ku ishte i pranishëm edhe kryeministri i Kosovës, Albin Kurti.
“NATO dhe ushtarët tanë do të qëndrojnë për të garantuar stabilitetin dhe për të parandaluar përkeqësimin e mëtejshëm të situatës”, shtoi De Riu, sipas të cilit megjithatë “është thelbësore të shmangen veprime të tjera të njëanshme nga palët e përfshira, të bëhet një hap prapa dhe të kontribuohet në zbutjen e tensioneve. “Qeveria italiane do të vazhdojë të punojë për të rivendosur qetësinë dhe për të inkurajuar rifillimin e dialogut në koordinim të ngushtë me aleatët tanë, duke filluar me BE-në dhe Quintin”.
“Paqja dhe pajtimi – theksoi Ambasadori – janë pjesë e një procesi të vetëm dhe dialogu me Beogradin i lehtësuar nga BE-ja mbetet thelbësor në funksion të një marrëveshjeje për normalizimin e marrëdhënieve, e cila është gjithëpërfshirëse dhe ligjërisht e detyrueshme, në përputhje me parimet e Bashkimit Evropian, veçanërisht në dritën e rezultateve të rëndësishme të arritura në Bruksel dhe Ohër në shkurt dhe mars të këtij viti”.
Në ngjarjen e organizuar nga Ambasada morën pjesë shumë ministra, deputetë, përfaqësues të shoqërisë civile, biznesmenë dhe media. Krahas çështjeve aktuale, në fokus të mbrëmjes ishte edhe bilanci i një viti të marrëdhënieve dypalëshe dhe nismave të reja kulturore dhe ekonomike për të sjellë më shumë Italinë në Kosovë dhe anasjelltas.
Vegza
- Videoja e mbrëmjes (YouTube)
- Amb. De Riu në GR1 (Rai) – minuta 15′
- Artikull në “Corriere della Sera” (02 qershor 2023)
- Artikull në “Repubblica” (02 qershor 2023)
