Ministri i Mbrojtjes, Lorenzo Guerini ka vizituar sot kontingjentin italian në Kosovë, me rastin e marrjes së komandës së misionit KFOR-it nga Italia, mision i pranishëm në Kosovë që nga viti 1999, që ka për qëllim promovimin e sigurisë dhe stabilitetit. Marrja e komandës nga Gjen. Div. Michele Ristuccia, që pason Gjen. Maj. hungarez Ferenc Kajári, i hap rrugën mandatit të trembëdhjetë italian në udhëheqjen e forcave paqeruajtëse shumëkombëshe në shërbim në rajon.
“Sot vijnë lajme dramatike nga Ukraina, për bombardimet ruse të kryera pa dallim në qytete, me objektiva civile, të cilat po shkaktojnë viktima në popullsi. Këto janë akte kriminale të cilave duhet t’u përgjigjemi duke mbajtur pozicionin tonë të vendosur në anën e Ukrainës dhe duke bërë thirrje për t’i dhënë fund kësaj lufte që po shkakton vuajtje për popullatën. Duhet ta ripërsërisim mbështetjen tonë pa mëdyshje, shumë qartë: Italia është në anën e Ukrainës dhe popullit të saj”, tha ministri duke iu drejtuar kontingjentit.
“Agresioni i pajustifikuar dhe i pajustifikueshëm i Putinit kundër Ukrainës është një plagë në zemër të Evropës, që kërcënon arkitekturën globale të sigurisë siç e kemi njohur ne”, shtoi ministri. “Kush e ka dashur këtë luftë, ta shikojë me sinqeritet atë që po ndodh, me rreziqet që ne po përballemi dhe të ndalojë menjëherë këtë veprimtari kriminale. Uroj që zërat për luftë do t’i lënë hapësirë përpjekjeve për një paqe të drejtë. Sepse pa drejtësi nuk ka paqe”.
Ministri Guerini, i shoqëruar nga Shefi i Shtabit të Mbrojtjes, Admirali Giuseppe Cavo Dragone, është pritur në Kosovë nga Presidentja e Republikës, Vjosa Osmani, nga përfaqësuesit e NATO-s, si dhe nga Ambasadori i Italisë në Prishtinë, Antonello De. Riu. Më pas, mori pjesë në ceremoninë e marrjes së komandës së misionit nga Gjen. Div. Michele Ristuccia, që pason gjeneralmajorin hungarez Ferenc Kajári, duke nisur kështu mandatin e 13-të italian në udhëheqjen e forcave paqeruajtëse shumëkombëshe në shërbim në Kosovë.
“Italia”, vazhdoi Ministri në fjalën e tij para kontingjentit italian, “nuk u shmanget sfidave dhe përgjegjësive që për shkak të rolit dhe historisë së saj është thirrur të marrë në këtë rajon, përmes aktiviteteve dhe angazhimeve të shumta, si në planin dypalësh dhe në kuadër të organizatave ku ne bëjmë pjesë. Ne jemi në Kosovë për mbi 20 vjet dhe jemi ndër vendet më të përkushtuara”. Sidomos në këtë moment, shtoi ministri Guerini, “puna jonë brenda KFOR-it është thelbësore për të ruajtur stabilitetin e këtij rajoni dhe për të zbutur çdo pasojë indirekte të konfliktit që po ndodhë”.
“Kosova”, përfundoi ai, “do të jetë gjithmonë një Vend mik, me rëndësi të madhe për ne: si për afërsinë gjeografike ashtu edhe për ndikimin e stabilitetit të saj në ekuilibrin e Evropës dhe Mesdheut”.
